MOMBE`UPY KA`A
Oikóje raka'e peteï karai ohayhuetereíva itajýra peteïme. Peteï mitãkuña iporã ha imarangatúva. Itúva hakate’ÿeterei hese ha ndoikuaái mba'épa ojapóta ani haguã ojehu chupe mba'eve ivaíva ha ha`’e oikuaa ko yvy apére oïha heta tekove ñaña. Upévare pe karai ogueraha mombyry itajýrape okyhyjégui umi mba'e vaígui, oho avei hendive hembireko. Heta oguata rire oike hikuái peteï ka'aguy tuichávape ha upépe opyta oiko haguã.

Upépe upe karai oñemity ha sapy'ánte oï ára ndoguerekóiha mba'éve ho'uarã, upéicha ramo oheka ka'aguýre yva térã eíra ho'u haguã.

Heta ára upéicha ohasa asy. Ko'ã mba'e nomokangýi chupekuéra ha ko'ë ko'ërente oñemityve hikuái. Peteï jey oguahë hogapekuéra peteï karai tujami ha he'i óga járape: -Ikatúpa apytami ko pyhare akemi pende rógape?

Omoneï chupe óga jára ha he'i itajýrape: -Tereho che rajy, umi mba'e mimi jarekóva ñane rembi'urã eme'ë ko karaípe, oimearã niko iñembyahýi.

Ha upéicha ome'ëmba umi mba'e oguerekomíva upe karai poriahúpe.

Upéi ko'ë rire pe karai ojekuaauka óga járape, ha'e ha'eha Ñandejára remimbou. He'i óga járape:

-Ñandejára niko ohepyme'ëse ndéve reñangareko porã rehe nde rajýre. Ani haguã ojehu chupe mba'eve ivaíva ha omano'y haguãaraka'eve, ajapóta chugui ka'avo. Ko ára guive ñahenóita chupe “Ka'a”. Heta mba'e vai ha iporãva ikatúta ko'águi ojejapo. Nde rajy araka'eve nomano mo'ãi, oñekytimba ramo jepe hakã, heñói pyahu jevýta ha iporãvéta. Ha péicha, ko mitãkuña porãgui oiko raka'e pe mba'e ojepurúva heta mba'érã ha ojekuaáva opa rupi, hérava ka'a.